خلود مسلماني

خاص صيدا نت

انعزموا ام طلال وام أحمد لعند جارتن أم سليم يلي ساكنة بالطابق الخامس على ترويقة ، وصلت ام طلال وام أحمد عالبناية لقو الكهربا مقطوعة ومافي اسونسير، قالت ام طلال هالحية أم سليم بتعرف ما في كهربا وتقنين من 6 للعشرة قامت عزمتنا حتى ما نجي ما كل عمرا بخيلة شو فينا علينا، ولك هيدي كل هما تفرجينا انو جابت صانعة جديدة جبلا ياها زوجا مع طلوع روح قد منا نكدة ونيقة. بترد ام أحمد نكاوة فيها بدي أطلع وعالدرج ردت ام طلال اي والله لازم نطلع لنشوف شو محضرة أكل هالعفشي وأكل مانو طيب وجوزا بضل بالمطاعم، بترد ام أحمد ولك سكتي من يومين شفتا عم تنشر غسيل ييييه ما أعجئا ما بتعرف تعمل شي منيح لجبلا هالصانعة لا تقيم شوي من وساختا. ام طلال كل شي وتكون هيدي ام لسان طويل ام ربيع معزومة . أم أحمد : ايه ولله يييي ما بطيقها. وصلنا يا أم طلال ايه ولله تكسرو جرينا يا ريت ما جينا. دقوا عالباب صرخت أم سليم لسرلنكيي" سيم" فتحي لباب . ام أحمد: ايه هلق بطلت تقوم تفتح كمان نسوان آخر زمن ما خصا بالتربية ولا بالبيوت، أم سليم: أهلا أهلا نورتوني أهلا بالحبايب مشتاقتلكن وين هالغيبي تفضلو عالصالون ولله جبتوا جديد و كتير غالي يا ام أحمد ما في منو بالسوق كلو، ام طلال: اه انشالله بتهري بالهنا حبيبتي و بتهز براسا، أم أحمد: بس لونو شوي قديم ومانو دارج هلق، ام سليم لا هيدا آخر لون بالسوق ما الو جمعة نازل. ام سليم: شو بتحبوا ترويقة أو القهوة قبل، ام طلال : لأ ترويقة بكفي طالعين خمس طوابق ع جرينا  وجعنا كان لازم تعزمينا بيوم بتكون الكهربا موعدا عنا. ام سليم: يييي ولله ناسيي ، بالاذن لا قوم قول لسيما تحط الاكل عالسفرة. ام أحمد بتوشوش ام طلال مجلوقة بالصالون وهوي ما في شي حلو، ام طلال اي ولله ما حبيته يقطع عمرا ع هاللون ما أبشعوا. ام سليم يلا تفضلوا عالاكل . ام طلال: بكرا العزيمة عندي بدي اعملكن اطيب صينية كنافة، ام سليم : الله يديمك يا ام طلال ما في أطيب من كنافتك، ام أحمد: ايه ولله كنافتا كتير طيبة. وبعد الاكل بتفوت ام طلال لتغسل ايديا بالحمام بتقول ام أحمد  لأم سليم ولله كنافتا سايطة وما الا طعمة بس الله بيعين منروح منتسلا، ام سليم: ايه والقطر فيها كتير وجبنة قليلة. بتجي ام طلال وبتفوت ام أحمد لتغسل ايديا بتقول ام طلال لا ام سليم يخرب بيتا هالام أحمد أديه بتحط كريمات عا وجا و بضلا مش حلوي، ام سليم : انا خنقتني انا وعم بوسة من ريحة الكريمات. بتجي ام أحمد بيفوتو الكل عالصالون وبتجيب سيما القهوة . ام سليم : شفت جارتنا اللي سكنت جديد بالحي منكدي عيشة جوزا بضلن يتخانقوا، ام أحمد: ولا بنتا بضل مزبطة حالا ما مصدقا تلاقي عريس، ام طلال: انا بعد ما شفتا دخلكن حلوي، ام أحمد : ما بها شي، ام سليم لا بشعة ما عارفي عشو جوزا كاين ماخدا. خلصت القهوة، قاموا ام أحمد وام طلال لا يفلوا، ام سليم : قعدو بعد ما شبعت منكم ، ام أحمد : شو طابخين اليوم؟ ام سليم: عم فكر أطبخ فاصوليا ورز، ام طلال: ولله بعدني محتارة ما عارفي، ام أحمد: أنا حأطبخ ملوخية ابو أحمد يؤبرني بيحبا. وبيضهروا من الباب، ام سليم: شرفتو. ام طلال: ما تنسو بكرا عندي. وهني ونازلين عالدرج، ام طلال: ما طيبي الترويقة والبيض مخبوص، ام أحمد: ايه ولله ولبنة حامضة. ام أحمد: شرفينا أم طلال نكفي صبجية عندي، ام طلال انشالله ضلي بخير، بدي روح نضف البيت، وما تنسي بكرا الصبح عندي سلمي عا ابو أحمد باي.