خليل إبراهيم المتبولي 

 الأب : يا با محمود وين المفتاح ؟

الإبن : أي مفتاح يا  با ؟!

الأب : المفتاح لي عطانا ياه جدّك قبل ما يموت

الإبن : مفتاح ؟!

الأب : عزا ... مَالك ؟.. مفتاح دارنا

الإبن : ليش نحنا إلنا دار يا  با ؟!

الأب : أُسكت وَلَه ... إيه  إلنا  دار وبيّارة ...

الإبن : ( يضحك ) وبيّارة كمان ؟ خَلص يا با خلص

الأب : وَلَه إيش  لي خلص ؟ تخلص روحك .

الإبن : تخلص روحي ؟ إذا خلصت روحي مين بيعطيك المفتاح وبحافظ عَلِيه

الأب : آه ، فإذاً قوم جيبو لهالمفتاح ... شو مشتاق لريحتو !..

الإبن : يا با جدي مات وهُوُ عم بشم ريحة هالمفتاح ... يا حرام يا جدي !

الأب : الله يرحمك يا با متت والغصّة بقلبك ... متت مقهور ع أرزاقك ودارك ...

الإبن : طيب يا با ، ليش ما منرجع ع دارنا ؟

الأب : لازم نرجع ، وتنرجع ، بدها تعود الكرامة والعزّة والنخوة عند العرب ...

الإبن : وكيف يا با ؟!

الأب : تنخاف ع بعض ونصير إيد واحدة

الإبن : آه حلو .. بس ما أسهل الحكي ..

الأب : صح يا با الكلام سهل بس التطبيق صعب ، لأنّو كل واحد من هالعرب قلبو ع حالو

 وع مصالحو وع عرشو  ...

الإبن : يا با بَدَكِش المفتاح ؟

الأب : جيبو تنشوف كيف صار بعد 67 سنة ...

الإبن : 67 سنة يا  با ؟!! آآخ

الأب : إيه والله آآآخ ... وآآآخ ... وآآآخ ...

الإبن : الله يرحمك يا جدي ...

الأب : الله يرحمو ..

الإبن : خايف يا  با ، قول كمان الله يرحمك يا با ، ويجو ولادي يترحمو عَلَاي ويضلو يشمو

 ريحة هالمفتاح ... شِم يا  با شِم ...