هلال حبلي:صيدا نت 
صدر اليوم بيان عن المسؤولين عن مدينة صيدا خلال اجتماعهم في بلدية المدينة، ومن صورهم تعرفون الأسماء، ولكن لفتني في هذا الاجتماع، مقطع مهم سوف أتناوله في هذا المقال.
حكوا عن موضوع استمرار الانقطاع شبه الكلي للتيار الكهربائي عن المدينة وما يترتب على ذلك من أعباء إضافية على المواطنين والمقيمين، وكان تأكيد على متابعة هذا الموضوع مع مؤسسة كهرباء لبنان لمعرفة سبب حرمان المدينة من الكهرباء وكي يبنى على الشيء مقتضاه.
أتعجب من السادة النواب الحاليين والسابقين وبلدية صيدا والقائمين على البلدية، لنبني على الشي مقتضاه ولنعرف سبب الحرمان، نحن يا أيها الفاعليات والنواب وممثلي مدينتنا صرلنا في أزمة الكهرباء أكثر من 7 سنوات، نزلنا للطرقات واعتصمنا وحرقنا الدواليب وربطنا بوابة مؤسسة الكهرباء بالجنازير، وتشحبرنا من الدواليب، ونحن نحكي عن مشكلة الكهرباء، إذا من 10 سنين، خلينا نقول 5 سنين، ونحن نعاني من الكهرباء وأنتم لا تعرفون سبب الحرمان للمدينة هذه مشكلة كبيرة، ليست عند الشعب، هي عندكم يا نواب حاليين وسابقين وبلدية صيدا، شو بتقولوا مش عارفين شو مشكلة الكهربا، شو عايشين بالمريخ مش بمدينة صيدا!
وأنتم بتعملوا اتصالات، معكم خبر يا مسؤولين عن مدينة صيدا إنه هبة السيد محمد زيدان لتدوير مولدات ومضخات مصلحة مياه صيدا في الفوار والعربي سكرت، استهلكت الهبة كلها.
من شهرين ما حسينا بأزمة المياه في صيدا، كانت الهبة شغالة، الله يعوض علينا وعلى السيد زيدان بالمصاري يلي حطها، الله يكثر خيره، هلق دوركم يا نواب حاليين وسابقين وبلدية صيدا، شوفوا متبرع أخر، يجيب كمية مازوت كبيرة ويشغلوا موتيرات الكهرباء لتعطي للناس مياه.
راح خبركم خبرية مزعجة، خط الخدمات من محطة الأولي ستوب، ليجي الخط من محطة الذوق، بيفرجها الله، في وعد يجي خط من الذوق، ولكن ليوصل على محطة الفوار بدها القصة كم شهر.
حداً يخبرنا كيف يمكن للموظفين وأبناء مدينة صيدا يلي بشتغلوا في الشحمة والدهان في المدينة الصناعية، كيف اليوم وبكرا بدهم يغسلوا ايديهم ويتحمموا، حداً يخبرنا هل على الناس تنام دون الاستحمام واستخدام المياه!
طرحكم بتناول موضوع كهرباء مدينة صيدا في الاجتماع ومتابعة الموضوع لفتلي نظري وحبيت ألفت نظركم للمشكلة يلي وقعنا فيها منذ ظهر اليوم، نراكم في التعليق الثاني.