أطلقت النائب في كتلة "المستقبل" بهية الحريري من مقر رئاسة الجمهورية في قصر بيت الدين، بحضور رئيس الجمهورية ميشال سليمان، مبادرتها في ذكرى إعلان دولة لبنان الكبير الـ 93، وقالت: "طموحنا بناء استراتيجية وطنية للبنان الكبير، والعمل الوطني يعني اللبنانيين فيما العمل السياسي يعني جزءاً منهم".
وأضافت: "أعتذر من الشعب اللبناني لأنني تقاضيت منه أجراً لا أستحقه خلال الدورة النيابية 2009، وسأعيد له كل ما تقاضيته من الدولة، وقيمته 25 مليون ليرة و282 ألف و500 ليرة لبنانية، لنؤسس من خلاله صندوق بحبك يا لبنان، وبإشراف دائم من الرئيس ميشال سليمان، كرئيس دائم للصندوق حتى بلوغ 2020.
واعتبرت الحريري أن "تمسك شباب وعلماء طرابلس بوحدة الدولة مصدر ارتياح للبنان".

وفيما يلي نص كلمة النائب بهية الحريري:
بسم الله الرّحمن الرّحيم
فخامة رئيس الجمهورية اللبنانية .. 
العماد ميشال سليمان .. المواطن اللبناني الكبير.. 
الأخوات والأخوة والأبناء .. 
مواطنات ومواطني لبنان .. 
يوم الأحد الماضي .. من طرابلس .. الجريحة والحزينة والمنكوبة .. توجهت بنداء على الهواء أطلب فيه من فخامة رئيس الجمهورية ..دعوة القطاعات .. الحيّة والمنتجة في لبنان .. إقتصادياً وتربوياً ومالياً وثقافياً وزراعياً وتعليمياً يعني كلّ الشعب اللبناني .. لأن اللي شفتوا بطرابلس رغم المأساة .. كان شئ بيكبّر القلب.. كلّ هولاء الشّابات والشّباب اللي عم يرفعوا الأنقاض.. ويبلسموا الجراح .. والكلام الرّفيع اللي سمعتوا من علماء طرابلس وقادتها بأنّوا ما في خيار غير الدولة الوطنية مهما كانت التّضحيات .. بالإضافة إلى التّضامن الوطني الكبير اللي شهدوا لبنان مع أهلنا في الرّويس وطرابلس .. ولمست التّقدير الكبير لكلمة فخامة الرئيس اللي كانت بوقتها وبمحلّها .. حسيت إنّو لازم نبعث لكلّ الشّعب اللبناني رسالة وطنية تليق بوطنيتو .. لأنّو اللي حامل البلد هو الناس اللي عم يسهروا ويأمنوا فرص عمل والمهن الحرة اللي بعدها مخلاية اللبنانيين كمجتمع بخير وأمان .. وبكلّ مجال والمزارع اللي أنا بعرفوا كثير وقديش بيهمّوا أنّو يطعمي كلّ اللبنانيين أطيب ما عندو .. والعامل اللي بيغطي عجزنا عن كتير من ضرورات حياتنا .. 
وكمان البطولات اللي حققها اللبنانيون بالرياضة ومش بس على مستوى المنطقة .. بل على مستوى العالم .. ولجان المهرجانات الجبّارة اللي خلّت لبنان حلو وحيّ بعيونّا وعيون العالم .. شي بيكبّر القلب .. وبيرفع الراس .. ومتلن القطاع السياحي الجريح .. والتّجارة المنكوبة كمان .. كلّ اللي عم يعملو اللبنانيين بيشرّف وممتاز .. وهو اللي مخلّي فكرة الدولة عايشة بفكرنا وبمشاعرنا .. 
نعم تمنيت على فخامة الرئيس أنو نلتقي رغم كلّ الظّروف الصعبة والمقلقة .. مش لنحتفل بواحد أيلول.. الذكرى 93 لإعلان دولة لبنان الكبير .. وعاصمته الحبيبة بيروت .. هيدا مش إحتفال .. هيدا لقاء وطني وللمرة الأولى .. وفي اليوم الأساس لقيام دولتنا .. وبدء تجربتنا الوطنية بلبنان الكبير .. هيدا اليوم اللي بدأت فيه رحلة التّحدي لدى النّخبة اللبنانية .. والمناطق اللبنانية بكلّ تكوّناتها .. وقدرْنا بصبر وثبات نبني دولة قادرة على الإستقلال بعد 23 سنة من المحبة والتّفتح والإجتهاد رغم العثرات .. 
بصيف 2010 بدأنا بالمبادرة الوطنية لمئوية لبنان الكبير 2020 .. وكان طموحنا إنّو نرسم إستراتيجية وطنية نقول فيها من اليوم أي لبنان نريد في مئوية لبنان الكبير عام 2020 .. ووجدنا إنّو لبنان قبل خمسين سنة .. يعني 1961 ..كان عندو إستراتيجية إنمائية كاملة .. لأنّو فخامة الرئيس الراحل فؤاد شهاب بــ 25 آذار 1959 طلب من مدير المركز الدولي للبحوث والحضارات "أرفد" في باريس الأب "لوبريه " إعداد مخطط متماسك لسياسة الإنماء المتّزن في البلاد .. يكون حول لبنان وحاجاته وإمكانياته الإقتصادية والإجتماعية .. تمت هيدي الدّراسة وقدّمت في أيار 1961 .. في تقرير من سبعة أجزاء .. والكلّ بيعرف إنّو كلّ شىء منيح بالدولة اللبنانية هوّي نتيجة "أرفد" اللي ما تطبّقت كلّها .. ووجدنا في المبادرة الوطنية لمئوية لبنان الكبير إنّو نبلش من "أرفد" لإنّها دراسة وطنية .. ونسأل : ماذا لو طبّقت خطة "أرفد" .. هل كان حصل في لبنان ما حصل ؟.. اللي بدّي قولو إنّو ما قدرنا من 2010 للــ 2013 نعمل شي بإستثناء تلك اللوحة الرّمزية اللي وزعناها حول لبنان 2020 .. 
شرّفني فخامة الرّئيس باستقبالي يوم الثلاثاء الماضي .. ووجدت لديه ما يشعره معظم اللبنانيين الآن بأنّه رمزاً للوحدة الوطنية .. وحارساً أميناً على الدولة والدّستور والأمن الوطني بكلّ أبعاده ومعانيه .. العسكرية والإنسانية .. وسمعت من فخامته تقديره للبنانيين وقطاعاته الإنتاجية والحيّة .. وبأنّهم ثروة لبنان .. وسرّه العميق .. ومصدر قوته وتمايزه .. وبصدق لقد أحسست بارتياح عميق .. بس لدقائق معدودة .. لأنّني حسيت بإنّو في حمل كبير ومسؤولية كبيرة حمّلني إيّاها فخامة الرّئيس .. بس طلب منّي إنّو أتولى الدعوة لهذا اليوم الوطني .. وإنّو اللقاء سيكون ساعة واحدة .. وعرفت بعدين إنّو هناك إرتباطات خاصة جداً لفخامته .. وهو سبب غياب اللبنانية الأولى .. رئيسة الهيئة الوطنية لشؤون المرأة اللبنانية .. اللي تأسّفتْ كثيراً لعدم وجودها معنا .. 
عرفتُ خلال الأيام الماضية وأنا أقوم بواجبي الوطني لهذه الدعوة .. شو هوي الخيط الرّفيع بين العمل الوطني والعمل السياسي .. وعرفت إنّو العمل الوطني يعني كلّ اللبنانيين.. والعمل السياسي يعني جزء من اللبنانيين.. 
إجتمعت مع فريق المبادرة الوطنية وجميعهم من الشّابات والشبّان حتى الآن .. وحاولنا نلاقي قاعدة تكون الدعوة فيها وطنية بامتياز .. حتى ما ندعي حدا.. بسبب قربه السياسي أو بعده أو العلاقة الشخصية .. وإنّو لازم المعايير تكون وطنية .. بدأنا بالتّجمعات الإقتصادية والصناعية والزراعية والتجارية.. والحمد لله كلن عندن غرف تجارة وإتّحادات وجمعيات وتجمّعات مقوننة .. ودعينا رؤساء هذه الكيانات .. وبعدين المهن الحرة كمان هناك نقابات وغيرها .. والله وفقنا بالقطاع التربوي طبعاً الزّملاء المعلّمين .. اللي بوجهلن تحية كتير كبيرة ودعم كبير.. ووجدنا بالهيئات الإستشارية للمدارس الخاصة في وزارة التربية .. وكمان الهيئة الإستشارية للجامعات.. وهون حسيت بالتّقصير الكبير اللي بتحمّل أنا جزء كبير منو كوني لا أزال رئيسة لجنة التربية والثقافة النيابية .. وقدرت قديش قصّرنا بحقّ هذه الكيانات الإنتاجية .. كالمدارس ولجان المهرجانات .. اللي لازم يصير عندن كيانات قانونية جامعة واللي لفتني إنّو حتى الآن صار في لبنان في العام 2013 أكثر من 40 مهرجان بالفنون والسينما والمسرح وكافة الإبداعات .. يعني عنّا أكثر من خمسين لجنة مهرجان بدون كيان قانوني جامع " إتحاد وطني " .. ناظم لاحتياجاتهم وحفظ أعمالهم .. وهيدا طبعاً بدّو تشريع.. والمشكلة الكبيرة اللي واجهتني وأنا جزء بسيط منها .. والباقي حقّ على البلد كلّه .. وهو مؤسسات المجتمع المدني .. واللي هنّي بالمئات والآلاف .. ويعملون في كلّ مجال وأنشط بكتير من مؤسسات الدولة إذا وجدت في بعض المجالات ..وتقريباً هنّي روح لبنان .. وبحبّ قلن إنّو اليوم قاعدة البيانات عنّا بتقول في أكثر من 150 نشاط وحيوية للمجتمع المدني على امتداد لبنان .. شي بيشرّف .. وللأسف لازم نلاقي تشريعات نحفظ فيها التّخصصات لدى الجمعيات الأهلية ونصنّفها .. ونقونن أطر جامعة لها .. وهون بدي أشكر إدارة القصر الجمهوري لأنّن تحمّلو عني دعوة بعض الأصدقاء لمؤسسات المجتمع المدني .... أمّأ بالنسبة لشباب لبنان فتشرفت بدعوة المتفوّقات والمتفوّقين بالشهادات الثانوية الرسمية لهذا العام .. وهنّي الحلم والأمل والرّجاء .. وتوجّهت بالدعوة لسفراء النوايا الحسنة من المبدعات والمبدعين اللبنانيين .. 
آسفة لأني شرحت كلّ ذلك لأني بدي حس إنّي مسؤولة .. ولازم كون محل مساءلة .. ولأنّو اليوم هوّي يوم المواطن اللبناني .. اللي بيشعر بأنّي قصّرت بالوظيفة اللي كلّفني فيها كنائب في الرقابة والتّشريع والمساءلة.. عن الأمة جمعاء حسب الدّستور .. ومش بس هيك .. هيدا المواطن بيتعب وبيشتغل ليدفعي راتبي الشهري .. وهون بدّي وجّه تحيّة لكلّ زملائي النّواب .. وكتار منهم انخرب بيتهم .. لأنّو أكلاف الحياة العامة غالية كتير .. وبعرف إنّو معظمهم عم يحاول فوق قدرته إنّو يخدم وطنه وأهلو .. 
بس في كتار كمان من الزّملاء النواب اللي الله منعم عليهم .. وبالنسبة لي وفي واحد أيلول 2013.. يوم المواطن اللبناني .. يوم إعلان لبنان الكبير .. وفي حضرة المواطن اللبناني الكبير .. فخامة رئيس الجمهورية .. العماد ميشال سليمان .. وبوجود رموز العمل والإجتهاد والإنتاج يتوجب عليّ كمواطنة لبنانية أن أعتذر من كلّ الشعب اللبناني لأنّي لم أقم بواجبي الوظيفي منذ العام 2009 حتى الآن .. وتقاضيت من الشعب اللبناني أجراً لا أستحقّه .. ولأنّنا بدأنا نعرف ومع أحفادي إنّو ما أعزّ من الولد إلا ولد الولد .. وإنّو ما أعزّ من الوطن إلاّ المواطن .. فإنّني أتشرّف أن أعيد للشعب اللبناني كلّ ما تقاضيته من هذه الدورة النيابية حتى الآن وقيمته خمسماية وخمسة وعشرون مليون ومئتان وإثنان وثمانون ألف وخمسماية ليرة لبنانية .. لنؤسّس من خلاله صندوق القيم الوطنية .. "حساب بحبك يا لبنان 2020 " .. وبإشراف دائم لفخامة رئيس الجمهورية .. العماد ميشال سليمان .. كرئيس شرف دائم للصندوق حتى بلوغ العام 2020 .. وبالتعاون مع جمعية المصارف اللي تؤمن فتح هذا الحساب في جميع المصارف اللبنانية وبالتعاون مع الهيئات المشاركة في هذا اللقاء الوطني .. وغيرها .. وأعتقد أنّ العديد من الزّملاء النواب القادرين سيشاركوننا في هذا الصندوق .. ويعيدون للشعب اللبناني ما أخذوه منهم لنشرع بإعداد الدراسات والإستراتيجيات والتّشريعات الضرورية التي نريدها لكي يكون لبنان عام 2020 وطن يليق بمواطنيه المبدعين .. والمنتجين .. والخلاّقين.. وبشراكة مع شبابنا المتفوق بالشهادات .. والجامعات .. وكذلك إحياء مناسبات الذكرى السبعين للإستقلال الوطني هذا العام .. 
أشكر لفخامة الرئيس .. المواطن اللبناني الكبير .. على ثقته وتجاوبه.. وأرجو أن أكون قد قمت بواجبي بكلّ أمانة ووطنية ..
وأتوجّه بالتّحية لكلّ المواطنات والمواطنين .. صغاراً وكباراً .. عمالاً ومزارعين .. مصرفيين وأطباء ومهندسين .. محامين وقضاة وسائقين .. طيارين ومقاولين .. وكلّ من يعمل في لبنان وبيدفع كلفة بقاء الدولة على قيد الحياة .. وأخصّ رجال الأعمال والتجار أيضاً .. الذين لا يزالون يثقون بوطنهم .. ويؤمّنوا فرص عمل لأبنائهم .. يجب أن نعتزّ كثيراً بالقطاع الخاص .. وبالسيدات ورجال الأعمال في لبنان .. وأن يكونوا محل تقدير واحترام .. كما أتوجّه بالتّحية للقوى الحية والمنتجة .. في الإدارات الوطنية .. العسكرية والأمنية والتربوية والإدارية ..
أيّها اللبنانيات واللبنانيون في كلّ مكان من أرض لبنان .. وفي العالم .. لن يبقى لبنان الكبير إلاّ بمواطنيه الكبار .. 
عشتم وعاش لبنان