الهيئة شوب كتير اليوم والصيفية مبلشة بكير, يا ريت محمد بعدو هون كنا رحنا عالبحر سوا ! بس محمد سافر على قطر ليأمن مستقبلوا.. احلى مشوار بحر كنا نروح مع بعض..
جربت ما خلي الموضوع يفقسني وقلت لحالي أو بالاحرى جربت اقنع حالي انو مش غلط قعدة البيت, تروقت وشربت فنجان شاي و بلشنا بهالفايسبوك, اول بوست طلع بوجهي:
ماهر: الوصول الى مطار رفيق الحريري الدولي للذهاب الى سيراليون للعمل...
طوني: ثالث شعنينة تمر وأنا في بلاد الاغتراب..
يلا ما هوي اصلا" الفايسبوك صاير يزهق سكرت اللابتوب وضويت التلفزيون..
عم قلب بهالمحطات طلع مسلسل اجنبي كتير حلو ذكرني بدينا كان برنامجها المفضل.. بس دينا وين؟؟ دينا هاجرت على اميركا...
يا خيي ازبط شي قوم انزل عند خطيبتي, كيف ما عم ببرم عم بتذكر اصحابي يلي هاجروا, منيح خطيبتي بعدها هون.. انا وعندها ومجتمعة العيلة تذكرنا ابن عمتها علي يلي مرة اشتغلنا سوى من سنتين, وينو؟؟ بأوكرانيا عم يكفي علموا!
خلصنا هالغداء وقلت بعمل كزدورة وبطلع عالشغل, مرقت من حد محل هشام.. عمو لهشام بالمحل وهوي مش هون.. ليه؟ هشام بالسعودية عم يأمن مستقبلوا..
وصلت عالشغل بعد هالنهار الطويل, اليوم السبت وفي حجوزات كتير, يلا بركي بنسى النكد يلي صار اليوم... وصلت اول طاولة:
-بدنا نولعها اليوم يا صلاح
-دايما" بتولعوها انتو يا شباب
-لا لا اليوم غير
-اوف ليه؟
-اليوم بدنا نودع أيمن مسافر على المانيا
-...
قامت طاولة ثانية بدها تفل:
- نشوف وجهك بخير خيي صلاح
- شو نشوف وجهك بخير؟ ما يومين وبرجع بشوفك متل العادي خيي رأفت
- لا صاحبي, بكرا مسافر على دبي على طول, شغل..
-....
شو بعدكن ناطرين؟ رفقاتنا واحد ورا الثاني عم يهاجروا! لأيمتن بدنا نبقى ساكتين؟ لنهاجر مثلن؟ ونخلي البلد لشوية أمراء حرب وأمراء طوائف!! بعتقد نزلة على مظاهرة لنطالب باسقاط النظام يلي كان السبب بسفر رفقاتنا أوفر من حق فيزا ..