بقلم : خليل ابراهيم المتبولي

- مرحبا ، شوأخبارك ؟
• يا هلا تمام ، ماشي الحال ، أنت كيف ؟
- أنا والله زهقان ، وطاقق قلبي ، عم فكّر نعمل قعدة غدا ، شايف الطقس منيح ، شو رأيك ؟
• غدا شو ؟ مش شايف الوضع ؟ ونحنا تنيناتنا مسؤولين
- زهقت من هالمسؤولية ، ما حدا رح يعرف ، منطلع ع بعلبلك ، الطقس حلو
• وليش بعلبك ؟!
- بعلبك مدينتنا ، ومدينة الشمس والنور ، وصرلنا زمان ما طلعنا
• حلوة الفكرة ، بس خايف من الوضع
- رح تضلك خايف ؟ خلص ، ومن شو خايف ؟
• والله الناس بتفضحنا إذا عرفت
- قلتلك ما حدا رح يعرف ، منعملها عالضييّق
• إذا عالضييّق أنا موافق ، يلا اتكل على الله
- متكلين عليه دايمًا ، ان شاءالله رح يكون مشوار حلو
• مشوار حلو مع الكورونا والطقس الحلو ، يا حلو أنت ياحلو ( بخوف)
- شو مهضوم ، خلص ما تخاف ، ما رح أعزم حدا ، قلتلك عالضييّق
• ماشي فهمنا ، بدنا نحافظ على التباعد وعالكمامة وعالمطهرات
- أكيد ، أكيد ، ما تقلق
• مش قلقان ، بس خيفان ( مع غمزة )
- ما تخاف ، ما تخاف ، خلص أنا حكيت مع حدا فوق ، يلا قوم تنمشي
• هلأ ؟!
- إيه هلأ ، ما عم نقول الطقس حلو ، خلينا نستغلو
• يللّا
( وصلا إلى بعلبك وإذا بمائدة عارمة بما لذ وطاب ونصف السكان موجودون على الطاولة)
• شو هيدا ؟!؟ ما على أساس عالضييّق وما رح يكون في حدا
- هيدا عالضييّق الأهل بس
• الأهل بس ، الله يستر
- قلتلك ما تخاف ، شوف ، مائدة عارمة ، ما بتتفوّت
• ما بتتفوّت ، بس نحنا كلنا رح نفوت بكرا عالمستشفيات
(في اليوم التالي صورة المائدة العارمة مع المعازيم على أول صفحة في كل الصحف المحلية والأجنبية ومواقع التواصل والمحطات العالمية )